ચાલ દોસ્ત !
એક ને એક આપણે અગીયાર થઈશું
બહાર ભલે ને સૌ કહે બૂઠ્ઠા,
આપણે અંદર થી ધારદાર થઈશું.
તો શું થયું પડ્યા જવાબ ખોટા...
આપણે તો અલગ જ સવાલ થઈશું.
બેફિકરી કે નફ્ફટાઇ, જે ગણો તે આ છે.
સ્પર્ધા નથી રમત છે આ તો,
ને મિત્ર મારો એનો ખાં છે।
ચેતી ને ચાલજો, અમે અજાણ નથી હોં,
રાખ ફૂંકી ને આગ થઈશું...
એક ને એક અગિયાર થઇશું.
- નિયંતા ભટ્ટ
સમય છે.... સ્થળ છે.... નાવિન્ય છે ને ભાવ પણ,
તો શબ્દો શાને ખૂટી રહ્યા છે?
ને વીખરાય જાય છે તાલ પણ...
રોમાંચ છે... આહ્લાદ મોસમ.... ને નવો અહેસાસ પણ,
તો અલંકારો કાં ખુટી પડ્યા?
અને શૃંગાર સહ વૈરાગ પણ...
સત્ય જાણુ... સમજણ છે.... અને, સામર્થ્ય પણ.
અહીં વિશ્વ આખુ સામે પડ્યુ છે,
હું એકલ અને અણજાણ પણ!
સુક્ષ્મ છે.... સર્વોપરી છે.... ને જગતનો નાથ પણ,
તોય શાને તુ બેઠો છે,
હાથ ધરીને હાથ પર?
(હરિ કહે છે)
હૈયુ આપ્યું.... હેત ભરેલું અને મહીં મુક્યો છે વિશ્વાસ પણ,
તું મુકી જો તારી ઉપર,
પછી ભલે ના કદી મુજને યાદ કર.
જાત ઘડી લે તારી પહેલા,
પછી બીજા બાંધકામ કર.
સમય મળ્યો તો જીવી લેને,
નાહક ના બહુ વિચાર કર.
પાથ ઘડયો છે મેં ગંતવ્ય ગમી નો,
તું બસ ખાલી પ્રવાસ કર!
- નિયંતા ભટ્ટ
સંબંધો આટલા સારા, પહેલાં ક્યારેય નહોતા
પણ આટલા અજાણ્યા ય આપણે પહેલાં ક્યારેય નહોતા...
હકીકત કંઈક અલગ છે, નથી જાણવી અમને,
જીવન સોનું સ્વતંત્ર છે, હા સ્વીકાર છે અમને.
પરંતુ આટલા બેદરકાર તમે, પહેલાં ક્યારેય નહોતા.
સંબંધો આટલા સારા, પહેલાં ક્યારેય નહોતા!
પાટા પર સરતી આ ટ્રેનની સાથ માં...
વહી જતો સમય..
ક્યાંક ભૂલાય છે તારી યાદમાં.
બસ એજ એક આશમાં,
હોઉં તારી બાહોપાશ માં...
શબ્દો થઇ જાય શાંત,
અને મૌન તણાં આભાસ માં...
જીવી લઇએ જીંદગી...
એ ક્ષણીક સહવાસ માં!
એકલતા એટલી હદે મને ગમેે છે,
કે મને મારી જાતનો સંગાથ પણ નડે છે!
-------------------------------------------------------
સદાકાળ સાથે ના રહ્યાનો ન ખેદ છે,
ઘડી ભર મળ્યાનો અાનંદ એજ સ્નેહ છે...
-------------------------------------------------------
આંખ માથી એક આંસુ સર્યું, અને હું હસી,
ચાલો,શરૂઆત તો થઇ કશી!
-નિયંતા ભટ્ટ
નભમા દિસતાં વ્યોમ મંહીથી ,
ઝરમર ઝરમર જળનાં ફોરાં ઝરતાં....
એ ફોરાં... મારૂં મન હરતાં.
વર્ષામય બની પક્ષીરાજ સૌ ,
થનગન થનગન મનોહર નૃત્ય કરતાં....
એ મોરાં...મારૂં મન હરતાં.
અનીલથી ઝુલતા...સલીલ શા વહેતા,
હાલક ડોલક તરૂવર થાતા.....
એ તરૂઓ...મારૂં મન હરતાં.
બુંદ બનતાં ફોરાં મંહીથી,
દળદળ થાતાં ઝરમર મંહીથી....
એ મેહનાં નખરાં...મારૂં મન હરતાં!
- નિયંતા સતિશચંદ્ર ભટ્ટ
તુ ગમે છે એટલે તારી દરેક વાત ગમે છે,
તારા વિનાની એ વિરહની રાત ગમે છે...
ઝંખે છે મન પણ એ જૂના વિવાદને ,
જાણી જોઈને કરેલી એ અધૂરી વાતને...
ને અચાનક સ્પર્શી ગયેલા એ હૃદયના સ્પંદનો,
મૌન રહીને સાથે લીધેલા આપણા એ નિર્ણયો...
સઘળું ય સચિત્ર યાદ છે, આ ના કોઇ ફરિયાદ છે,
એક હૈયા એ હૈયા ને હેતથી કરેલો સાદ છે...
મને વારંવાર વાગોળવી એ તારી યાદ ગમે છે,
બસ તું ગમે છે એટલે તારી દરેક વાત ગમે છે....
- નિયંતા સતિશચંદ્ર ભટ્ટ
